Погледнете како изгледа студентскиот „Гоце Делчев“ по реконструкцијата

Драстично нов изглед и подобрени услови. Уште на прв поглед, во ходникот на студентскиот дом „Гоце Делчев“, со новите прозорци, парно и лифт, се гледа квалитетот на реконструкцијата, која е во завршна фаза, пишува Република.

Во блокот „Б“ на овој некогаш најзапоставен дом, се монтира новиот и функционален мебел. Наскоро овде ќе влезат и првите станари.

Управникот на блоковите А и Б, Андон Смилевски вели дека се мислело на секој детаљ за студентите да ги добијат соодветните услови за живот и студирање.

Собите на најгорните спратови се подготвени за новите станари. Во нив е зачувана практичноста, но со нов мебел, фрижидер, мини кујна, големи плакари, биро и се што е потребно. Најважното е што конечно, во домот ќе биде достапен и безжичен интернет за сите.

Во наредните денови, пак, ќе биде распишан тендер за набавка на нови лифтови за сите студентски домови во земјата, најави заменик-министерот за образование и наука Спиро Ристоски.

Министерството за образование и наука веќе го заврши проектот за реконструкција и санација на блокот „А“, односно вториот следен блок за реконструкција и за него, како што соопшти Ристоски, се очекува во првата половина од ноември да се распише тендер за реконструкција и санација.

– Со тоа студентите од блок „А“ ќе бидат целосно префрлени во блокот „Б“, а блокот „А“ ќе биде целосно затворен и на него ќе почне да се работи, нормално по изборот на компанијата. Паралелно МОН за да не губиме време ги забрза сите активности и веќе сме во фаза на подготовка и на проект за останатите два блока, блоковите „В“ и „Г“ и за мензата во СД „Гоце Делчев“, рече заменик-министерот.

Проектите за нив очекува да бидат готови до Нова година, а потоа да бидат распишани тендери од страна на МОН и тие да влезат во фаза на подготовка за градежни активности.

– Мора да се има во предвид фактот дека неопходно е да постои добра организација и паралелно со градежните активности и сместувањето на студентите заради капацитетите. Ние можеме и да го затвориме целиот студентски дом, меѓутоа во тој случај повеќе од 1.300 студенти ќе останат без можност да бидат сместени. Затоа мораме да одиме етапно и со сместување и со реконструирање, истакна Ристоски, кој додаде дека е задоволен од динамиката.

Завршувањето на работите на СД „Гоце Делчев“ според Ристоски би можеле да завршат до крајот на 2016 година или почетокот на 2017 година.

– Во текот на минатата година имавме проблем од два до три месеци кога не можеше да се изведуваат градежни активности. Согласно планот и динамика реална можност постои до крајот на 2016 година, меѓутоа оптимално е да се каже дека веројатно дел и од 2017, ќе бидат завршени активностите во СД „Гоце Делчев“, рече заменик-министерот.

Информираше исто така дека во наредните неколку денови ќе биде распишан тендер за обезбедување нови лифтови не само во СД „Гоце Делчев“, туку во сите студентски домови во Република Македонија.

ФОТО: Република