Почна чистењето на тетовската депонија

Компанијата „Голец Транс“, која понуди најдобри услови согласно критериумите на огласот за јавна набавка, избрана е за извршување услуги за дислоцирање на сметот од депонијата во Тетово, информира владината прес-служба.

Постапката, како што се наведува, завршила во петокот, на 18 август.

- Во соработка со Јавното комуналното претпријатие Тетово, овие активности за дислокација на отпадот почнуваат денеска. Отпадот од оваа депонија ќе биде складиран во депониите Дрисла или Русино, соопшти владината прес-служба. 

Согласно одлуката од 17. седница на Владата на Република Македонија, завршена е и постапката за решавање на проблемот со депонијата во Струга.

- Отпадот од општина Струга во натамошниот период ќе се транспортира во депонија што ќе ја договори општинското комунално претпријатие, а сегашната дива депонија ќе почне да се затрупува и ќе биде спроведено нејзино култивирање соодветно на неопходните еколошки стандарди, се вели во соопштението.