Почна аплицирањето за дополнителните два денара поддршка за лозарите

Од денеска до 25 декември 2019 може да се поднесуваат барања за дополнителните два денара поддршка за лозарите со која се опфатени сортите смедеревка, вранец картошија, станушина, бургундец црн, жилавка и кадарка.

Како што соопшти Платежната агенција, поддршката е за произведено и предадено грозје во преработувачки капацитет, а корисници може да бидат лозарите кои производството го предале во регистрирани капацитети за вино.

-Барањата за добивање средства од оваа мерка се поднесуваат електронски на www.ipardpa.gov.mk. Апликантите кои не знаат сами да поднесат барање или имаат потреба од помош, може да се обратат во подрачните единици на Министерството за земјоделство, вели директорот на Агенцијата, Николче Бабовски.

Одлуката за оваа нова дополнителна субвенција од два денара за килограм предадено грозје во рeгистрирани винарници, Владата ја донесе на 13 ноември годинава.