Почина творецот на Киндер јајцето

Творецот на Киндер јајцето Вилијам Салис почина синоќа во 83 година во италијанскиот град Павиа.

Тоа го објави фондацијата „Колор јор лајф“ која Салис им ја посвети на талентираните млади луѓе.

Салис, кој во компанијата „Фереро“ почна да работи во 1960 година, многу брзо му стана десна рака на нејзиниот сопственик Микеле Фереро, „татко“ на Нутелата кој почина минатата година.

Се наведува дека во 70-тите години од минатиот век италијанскиот производител на чоколадни бонбони се обидел да создаде нешто ново наместо традиционалните чоколадни јајца чии калапи се користеле само за време на Велигден и така настанало Киндер јајцето.

За повеќе од 40 години „Фереро“ продаде милјарда Киндер јајца.