По повод 11 Октомври положено цвеќе на Партизанските гробишта во Бутел

Со положување цвеќе на Партизанските гробишта во Бутел започнаа празничните свечености по повод одбележувањето на државниот празник „11 Октомври – Ден на народното востание“ во Скопје, Прилеп и Куманово.

Како што соопшти владината прес-служба, во знак на сеќавање и почит за учесниците во народното востание и народно-ослободителната војна делегација на Владата на Република Северна Македонија, предводена од заменик претседателот задолжен за економски прашања и за координација со економските ресори Кочо Анѓушев, заедно со Нина Ангеловска, министерка за финансии и Дамјан Манчевски, министер за администрација и информатичко општество, положи цвеќе на Партизанските гробишта во Скопје.

Во Прилеп свеченостите за одбележување на празникот се одржаа пред споменикот на Методија Андонов-Ченто и пред споменикот на Кузман Јосифовски-Питу, како и на Могилата на непобедените.

Делегацијата на Владата во Прилеп ја предводи министерот за транспорт и врски Горан Сугарески, заедно со Мила Царовска, министерка за труд и социјална политика и Елвин Хасан, министер без ресор задолжен за странски инвестиции.

Содржините за одбележување на 78-годишнината од денот на народното востание на македонскиот народ против фашизмот и за македонска државност во Куманово започнаа со положување цвеќе на Спомен – Костурницата.

Владината делегација во Куманово ја предводи Претседателот на Владата на Република Северна Македонија Зоран Заев, заменик претседателот во Владата и министер за внатрешни работи Оливер Спасовски, Арбер Адеми, министер за образование и наука и Зорица Апостолска, министерка без ресор, задолжена за странски инвестиции.

Во рамките на свечената програма за одбележување на државниот празник „11 Октомври – Ден на народното востание“ во Куманово се обрати премиерот Заев.

Премиерот Заев и членови на Владата ќе присуствуваат и на свеченоста во Собранието на Република Северна Македонија по повод доделувањето на високата државна награда „11 Октомври“.

На сите свечености по повод одбележувањето на државниот празник „11 Октомври – Ден на народното востание“, ќе земат учество членови на Сојузот на борците, дипломатскиот кор во нашата земја, и претставници на општествените и граѓанските организации во земјата.