Планинарска акција „По патот на комитите“

Во организација на Здружението за планинарење и заштита на планината „Калин Камен“, се одржа втората планинарска акција „По патот на комитите“.

-Акцијата се организираше во пресрет на Денот на македонската револуционерна борба и македонска независност, а ние сме презадоволни од интересот за учество. Одзивот беше голем, стотина планинари ги искористија поволните временски услови за овој период од годината и беа дел од планинарската авантура низ Осоговските планини, истакна Соцко Тасевски од ЗПЗП „Калин Камен“.

Патеката е хоризонтална, со должина од околу 28 до 30 километри и нема некои поголеми искачувања или спуштања. Планинари и рекреативци од разни возрасти имале можност да уживаат во прекрасните пејзажи на овој планински крај.

- Стартот на патеката беше езерото Калин Камен, минавме преку месноста Слана Бара, до т.н. Комитска колиба со пространи пасишта над локалитетот и прекрасни шумски предели каде природата ги распослала сите бои на есента. Ги посетивме изворите на Дурачка Река кај Чашка, прдолживме кон Бел Камен и Бабина чешма, а паузата за ручек беше на Столев Врв. Оттаму рутата мина низ Костадиница преку Корија, до Дурачка Река, рече Тасевски.

На овој начин, ЗПЗП „Калин Камен“ го одбележа 23 Октомври. Од Здружението ги поканија сите кои имаат слободно време и желба за дружење да им се придружат на следните планинарски акции предвидени со годишниот календар.