Македонија
11. January 2020 - 10:46

Планинарите од „Љуботен“ традиционално во новата година прво го искачија врвот Љуботен

Планинарите од планинарскиот клуб „Љуботен“ согласно традицијата кај нив во првите денови од 2020 година го искачија врвот Љуботен на 2.499 метри надморска височина. Станува збор за интерна тура, а врвот го искачија само неколкумина најподготвени и најискусни планинари.

-На силен ветер и сонце кое едвај ѕирка зад облаците, љуботенци ја отворија Шарпланинската Порта. Аманетот оставен од нашите предци беше достојно испочитуван. Иако групната слика со знамето е неколку метри под врвот, силниот ветер си го направи своето. Врвот беше достојно искачен, а клубското знаме секогаш широко отворено меѓу љуботенци, информираат од ПК Љуботен.

Утре следува уште една интерна тура за најподготвените на највисокиот шарпланиски врв Титов врв. Отворените планинарски тури на кои можат да учествуваат и рекреативците започнуваат од февруари.