Пелистер со гол во финишот го совлада Вардар

Фудбалерите на Пелистер со гол во судиското продолжение триумфираа вечерва во Битола во дербито против вечниот ривал Вардар со 1-0 во завршниот натпревар од 13 коло во Првата македонска фудбалска лига (ПМФЛ).

Во спектакуларна атмосфера и пред бројна публика на стадионот „Петар Милошевски“, која одамна е раритет на натпреварите во македонското првенство, Пелистер до победата дојде со голот на капитенот Мирко Ивановски во втората минута од судиското продолжение.

Со вечерашниот триумф Пелистер се искачи на седмото место на табелата, а Вардар остана последнопласиран.

Претходно денеска се одиграа пет натпревари од редовното коло: Работнички – Шкендија 0-0, Брера Струмица – Силекс 0-1, Беса – Струга 1-2, Шкупи – Гостивар 0-1 и Воска – Тиквеш 0-0.

Табела: Работнички 25, Шкендија 24, Силекс 24, Гостивар 24, Струга 22, Шкупи 16, Пелистер 16, Брера 15, Беса 12, Воска 11, Тиквеш 9, Вардар 8.