Педро донесе уште еден Супер куп на УЕФА на Барселона

Барселона и Севиља во Тбилиси го одигра најефикасниот Супер куп на УЕФА во историјата откако во регуларните 90 минути постигнаа осум погодоци, а Севиља направи чудо во второто полувреме и успеа од 4:1 за Барселона да стигне до 4:4. Во продложението решавачкиот гол го постигна Педро, кој по вторпат на идентичен начин и носи трофеј на својата екипа.

 

Банега го отвори резултатот уште во третата минута од слободен удар, а потоа на ист начин и тоа двапати (7 и 16 минута) се реваншираше Лионел Меси, постигнувајќи два прекрасни гола од слободен удар.

 

Рафиња во 44.минута зголеми на 3:1, а Луис Суарез на почетокот од вториот дел (52) донесе и водство од 4:1 за каталонскиот тим, Рејес во 57.минута намали на 4:2, Гамеиро од пенал (72) најави дека Севиља може до нерешено, а новото засилување Конопљанка во 82.минута постигна погодок за 4:4 со што мечот отиде во продолженија.

 

Сепак, во 115.минута, по слободниот удар на Лионел Меси, којшто го одбрани Бето, на одбиената топка налета Педро и ја смести во мрежата за конечни 5:4.

Ова е петти трофеј за Барселона во Супер купот.