Партиите се сложуваат со пасоши со старото уставно име да се гласа на избори

СДСМ ќе го поддржи предлогот на ДИК, документите со Република Македонија да важат за претстојните избори. На ова решение работеле уште од лани вели лидерот Ковачевски. Тој смета дека на граѓаните треба да им се овозможи правото на глас. Ковачевски не ја знае точната бројка но вели има околу 100 илјади граѓани со важечки документи со старото уставно име. 

Кога се во прашање изборите согласни се сите политички партии. Од опозициската ВМРО-ДПМНЕ најавија дека ќе гласаат во парламент за преодните одредби предложени од Државната изборна комисија. 

 „Прифатливо е секое издржано решение со коешто ќе се надмине проблемот, односно решение со коешто ќе се овозможи да може секој граѓанин непречено да го исполни своето право да гласа на изборите.“- велат од ВМРО-ДПМНЕ

Измените со преодна одредба во Изборниот законик, важечките пасоши со старото уставно име да се валидни за гласање, ги предложи ДИК. Претходно опозициската ВМРО-ДПМНЕ не доби поддршка пасошите да важат до крајот на годината за севкупна употреба, бидејќи власта сметаше дека со тоа ќе се прекрши Преспанскиот договор, а проблемот со хаосот за издавање документи немало да се надмине.