Отворена изложбата „Византиски и поствизантиски сакрални споменици во Кумановско“

Куманово и Кумановско можат да се гордеат со сакралните споменици, со црквите и манастирите од византискиот и поствизантискиот период, како и двете џамии од османлискиот период, истакна министерот за култура Хусни Исмаили во Уметничката галерија во Куманово на отворањето на изложбата „Византиски и поствизантиски сакрални споменици во Кумановско“.

Пред присутните гости, меѓу кои и градоначалникот на Куманово Максим Димитриевски, министерот Исмаили рече дека Куманово – градот на културата за 2019 година – може да се гордее со богатото културно наследство од над 40-ина средновековни храмови.

Тој додаде дека посетителите во наредните денови ќе можат да уживаат во уметноста на сакралната архитектура, дополнета со цртежи од значајни композиции од фрескосликарството, како и од арабеските на џамиите и фрескокопиите од старонагоричкиот храм.