Отворање Етно одаја на Здружението „Арти крафт“

Здружението на уметници ракотворци „Арти крафт“ од Скопје, кое постои пет години, денеска ќе отвори Етно одаја во која ќе претстави носии од скопскиот регион, стари предмети од покуќнина, како и сувенири изработени од неговите членови.

Етно одајата е сместена во барака на ул. „23 Октомври“ бр. 4 спроти ОУ „Браќа Миладиновци“ во општина Аеродром. Се простира на 80 квадратни метри во три простории, во кои ќе има три изложби - на народни носии, сувенири и копаничарски предмети.

Народните носии што ќе бидат претставени во одајата се од Скопска Блатија и Скопска Црна Гора. Петнаесетина од нив се од приватната колекција на Достана Караѓозовска-Станковска, која е една од 26-те ракотворци - членови на ова здружение и која поседува богата збирка од над 150 носии.

ЗУР „Арти крафт“ ја збогатува збирката за Етно одајата по пат на донации на стари етно предмети кои не им се потребни на дарителите. Тие може да бидат подарени на трајно користење или привремено отстапени. 

Во Етно одајата ќе има и едукативни работилници каде што во живо ќе бидат претставени стари занаети - ткаење на разбој, копаничарство, грнчарство, опинчарство, изработки со срма и слама, филигран, пирографија, плетење и нижење монистра...