Откажано свеченото отворање на Агротика во Солун поради протест на земјоделците

Церемонијата по повод свеченото отворање на 26. земјоделска изложба Агротика во Солун е откажана со цел да се обезбеди нејзино непречено функционирање, изјави управниот директор на Хелекспо Киријакос Позрикидис.

Како што јави дописникот на МИА од Атина, земјоделците кои со денови протестираат против пензиските реформи што ги планира Владата, претпладево се собраа на локацијата каде што требаше да биде отворена изложбата и откако тензиите почнале да ескалираат, организаторот во договор со министерот за рурален развој, Евангелос Апостолу одлучи да го откаже настанот за да се избегнат понатамошни тензии.

- Изложбата е најголема на Балканот. Сакавме таа да биде празнување на примарниот сектор, а не да биде обележана со какви било судири или други инциденти кои ќе влијаат на имиџот на изложбата и на градот Солун, додаде Позрикидис.

Тој истакна дека Агротика нуди многу работи за грчката и локалната економија и оти сите хотели се целосно резервирани.

- Нашата цел е да обезбедиме непречено функционирање на изложбата, изјави претседателот на Хелекспо.