Османи: Очекуваме валоризација на сработеното и почеток на преговорите со ЕУ
Заменик претседателот на Владата задолжен за европски прашања, Бујар Османи, кој е во работна посета на Република Финска, денеска имал средба со министерот за европски прашања Само Терхо, на која биле отворени теми за процесот на проширување на ЕУ со земјите од западниот Балкан, како и евроатлантските перспективи на Македонија
– Доаѓам во веројатно најважниот период за нашите европски интеграции, веднаш по успешната имплементација на Договорот од Преспа, што претставува историска пресвртница не само за нашата земја, туку и за целиот регион, истакнал Османи на средбата, соопшти денеска Секретаријатот за европски прашања. Тој посочил дека успехот на Македонија, да ги затвори практично сите отворени политички прашања, и да се наметне како единствена земја на Балканот, без ниту едно посериозно отворено прашање, претставува успех на европската идеја на Балканот, и ќе претставува поттик и за останатите земји во создавањето доверба кон оваа идеја.
– Тука секако мислам на дијалогот Приштина – Белград, чии успех ќе значи целосна интеграција на Балканот во рамките на евроатлантските структури, што ќе претставува значен чекор во создавањето на побезбедна, постабилна и попросперитетна Европа, рекол Османи.
Презентирајќи ја динамиката на спроведувањето на реформите од Планот 18, Османи ја потенцирал интенцијата на Владата да ги имплементира практично сите преземени обврски, создавајќи со тоа услови за чиста и беспрекорна препорака од страна на Европската Комисија, која би водела до конфирмација на одлуката за почеток на преговори од страна на Европскиот совет во јуни оваа година.
– Европската идеја на Балканот има смисла само доколку процесот добие вистинска валоризација преку конфирмација на одлуката и почеток на преговори со Македонија од страна на Европскиот совет во јуни оваа година, подвлекол Османи, изразувајќи надеж дека во рамките на претседателството на Финска со ЕУ, во втората половина од оваа година, Македонија и ЕУ ќе ја реализираат и првата меѓувладина седница, со што и формално ќе започнат билатералните преговори.
Имајќи ја предвид успешната примена на двојазичност во рамки на финската администрација, каде покрај финскиот, во целосна службена употреба е и шведскиот јазик, Османи побарал поддршка во знаење, размена на искуство и начин на имплементација согласно потребите за усогласување на администрацијата и во Македонија со новиот закон за употреба на албанскиот јазик.
Во рамки на посетата на Владата на Финска, Османи остварил средба и со Нина Нуркала специјална советничка за европски прашања на премиерот Јуха Сипилја, како и со делегацијата на Министерството за надворешни работи, предводена од државниот секретар, Самули Виртанен. Во рамки на посетата на Финска, Османи го посетил и финскиот Парламент, каде имал средба со делегацијата на Комисијата за Европски прашања, предводена од претседавачот Артон Сатонен. На маргините на средбата, Османи имал можност да го посети и т.н. „Европскиот центар на извонредност“ (European Center of excellence), посветен на борбата против современите хибридни закани, кој работи под покровителство на Европската Унија и НАТО, а се наоѓа во Хелсинки.
Ново на Сител
-
Албанија „ќе увезе“ 40.000 работници од Филипините
-
Приведен криминалец баран со потерница
-
Постепено забрзување на економскиот раст и просечна инфлација од 3,5 отсто, предвидува Народната банка
-
До четврток посвежо со локална нестабилност и пообилни врнежи
-
Германската амбасада со честитки до Силјановска Давкова за преземањето на нејзината улога како прва жена претседател
-
„Политико“: Силјановска-Давкова предизвика расправии со Грција уште при полагањето заклетва
-
ДИК ќе одлучува по однос на пристигнатите приговори од парламентарните избори
-
За брзо возење казнети 553 возачи