Орбан пристигнува во Охрид, градот под засилен безбедносен режим

Засилени безбедносни мерки и посебен сообраќаен режим во Охрид за време на посетата на унгарскиот премиер Виктор Орбан. Полициски службеници од цела држава се распределени на  трасата како и на целото подрачје каде  ќе се движат автомобилите на високата делегација на одредени објекти, локации и сообраќајници.Денеска и утре на  улиците „Илинденска“ и „Коста Абраш“   забрането е запирање и паркирање на патнички и други моторни возила, а во тек на движење на возилата во состав на делегациите, привремено за сообраќај ќе биде затворен дел од магистралниот пат Кичево-Охрид, од аеродромот до клучката кај „Распаќе“, булеварите „Туристичка“ и „Македонски просветители“, улиците „Абас Емин“ и „Кирил и Методиј“ како и регионалниот пат Охрид-Св.Наум.

Од СВР Охрид апелираат до граѓаните, да ги почитуваат насоките на полициските службеници кои, ќе вршат физичко регулирање на сообраќајот.

Унгарскиот премиер Орбан  ќе се сретне со премиерот Мицкоски. Ќе се одржат и низа билатерални средби на македонските министри со ресорните колеги од унгарската делегација.

На маргините на дводневната посета е предвидена и прошетка во градот, посета на црквата Богородица Перивлепта, Античкиот театар и манастирскиот комплекс „Свети Наум“.