Општина Штип реагира на испишаните графити во централното градско подрачје

Во централното градско подрачје во Штип утринава на ѕидовите на неколку институции и станбени згради се испишани недолични политички графити.

Портпаролот на Општина Штип, Драган Ристов вели дека локалната власт остро реагира на испишаните недолични политички графити, бидејќи во 2013 и 2014 година реализираше акција за чистење на старите графити по објектите.

- За жал по една година истото се случува и ние повторно ќе апелираме и ќе кажеме дека ѕидовите не се место, каде што се прави политички дијалог и каде што се креира политика. Постојат институции за таа работа, Совет на Општина Штип каде што членуваат различни политички партии, имаме и Парламент, каде што по правило треба да се води политичка дискусија, но не и на ѕидовите, рече Ристов.

Тој истакна дека штипското комунално претпријатие „Исар“ веќе е информирано и треба да ги исчисти и бојадиса ѕидовите на кои се испишани графитите, за што ќе се потрошат пари кои граѓаните ги дале за реализација на одредени проекти.