Општина Радовиш доби „Урбан ѕид“

Младите од Радовиш денеска добија „Урбан ѕид“ на кој ќе можат да испишуваат пораки за заштита на животната средина и да цртаат графити со позитивна тематика.

 

Урбаниот ѕид, кој се наоѓа на спортско - рекреативниот центар "25-ти Мај", официјално го отворија директорот на Агенцијата за млади и спорт Марјан Спасески  и градоначалникот општината Сашко Николов.

 

- Овој проект, кој го реализира Агенцијата за млади и спорт, е наменет за младите преку поддршката тие да се изразат на  креативен начин,  да се поттикнат да бидат креативни и пред сè преку можноста тие да имаат свој простор, кој од денеска ќе биде наменет за нивното креативно изразување. Проектов досега го реализиравме во десетина општини низ цела Македонија, а интересот се повеќе се зголемува, изјави Спасески.

 

Тој изрази надеж дека граѓаните и пред се младите луѓе позитивно ќе го прифатат проектот, чија основна цел е младите својата креативност да ја насочат во позитивна насока и да се одвратат од идејата да пишуваат графити каде било и со каква било содржина.

 

Градоначалникот Николов ја поздрави акцијата на Агенцијата за млади и спорт и информираше дека општината ќе определи дополнителни локации за креативно творење на младите.