Одложени претседателските избори во Австрија

Австрискиот министер за внатрешни работи Волфганг Соботка изјави на прес-конференција дека Владата одлучила да го одложи повторувањето на вториот круг од претседателските избори, кој требаше да се одржи на 2 октомври.

Како евентуални нови датуми за одржување на вториот круг од изборите Соботка ги наведе 27 ноември или 4 декември, додавајќи дека Владата ќе направи се што е можно тоа да се случи до крајот на годинава.

Министерот им се извини на сите избирачи, кои веќе гласале преку пошта, како и на двајцата претседателски кандидата - Александар ван дер Белен и Норберт Хофер.

Одложувањето на изборите поради технички проблем, кој е поврзан со одлепување на ковертите, претставува преседан во Австрија, поради што ќе треба да се изврши и измена во законот, со што ќе се овозможи одложување на повторното спроведување на втор круг од гласањето. Друг проблем, кој треба да биде решен, е на каков начин да се подготват изборните списоци, бидејќи законот предвидува да се користат списоците од првиот круг, а логично е тие да се ажурираат бидејќи во меѓувреме има починати лица, како и млади луѓе кои добиле право на глас.

Според првичните информации, одложувањето на вториот круг од претседателските избори ќе ги чини Австријците два милиона евра.