Одличен прием на „Трето полувреме“ на Биеналето на израелски и еврејски филм во Нанси
Кинопремиерата на „Трето полувреме“ на режисерот Дарко Митревски во Франција беше поздравена со аплузи од публиката на 4. Биенале на израелски и еврејски филм кој вчеравечер беше отворен во Нанси, пренесува дописникот на МИА од Париз.
Проекцијата на филмот во киното „Камео“, со кој беше отворено Биеналето, помина во необичен амбиент со засилени безбедносни мерки, присуство на припадници на армијата и полицијата пред киносалата поради последните случувања во Франција.
Организаторот на фестивалот - Еврејскиот културен центар од Нанси, основан во 1920-тите години од еврејската дијаспора, долго размислуваше дали да го одложи филмското биенале, по што инсистираа на значењето да се продолжи со културните манифестации.
Според организаторот, изборот на еден македонски филм, кој ја третира темата на депортацијата на Евреите, придонесува да се запознае подобро историјата на Европа. Беа изненадени од фактот што филмот со оваа тематика доаѓа од земја чија кинематографија не е многу позната за француската јавност, и е реализиран од режисер Македонец.
По проекцијата беше отворена дебата за филмот на која зборуваше главниот актер Сашко Коцев, и амбасадарот на Република Македонија при Советот на Европа Петар Поп Арсов, со чија помош, во соработка со Меѓународниот филмски фестивал од Нанси, „Трето полувреме“ беше предложен за Биеналето.
Покрај содржината на филмот и пораката која тој ја носи, публиката посебно беше импресионирана од играта и квалитетот на екипата актери, напорите за веродостојност при користењето на ладино - јазикот на сефарадите, и од одличната режија на Дарко Митревски.
Организаторите не го криеја разочарувањето што овој филм не беше пошироко дистрибуиран во француските киносали, но веќе го има во француските продавници во ДВД и блуреј-издание со превод и синхорнизација на француски јазик.
Ново на Сител
-
Мирен марш за поддршка на Епископот Партениј
-
МПЦ-ОА одбележа 1700 години од првиот собор во Никеја
-
Бања од римски период откриена во приватен двор во струмичко Баница
-
Салите во ЦК „Марко Цепенков“ – Прилеп отворени и оспособени за одржување на настани, актерите бараат нов театар
-
Кинеските инфраструктури и нивното влијание
-
Преглед на вестите од светот
-
Еден пилот и ниту еден ер трактор - како ќе се гаснат летово пожарите?
-
Тема на денот со Арбен Таравари