Одбележување на 90 години од постоењето на КУД „Панче Пешев“ во Куманово

По повод одбележувањето на 90 години од постоењето Културно уметничкото друштво „Панче Пешев“ во наредните три дена ќе организира дефиле на фолклорни ансамбли низ улиците и плоштадот во Куманово, етно изложби, фолклорна вечер со учество на културно-уметнички друштва од Македонија, Србија и Бугарија.

Како што соопштија на денешната прес-конференија од КУД „Панче Пешев“ и градоначалникот на општина Куманово, Зоран Дамјановски, станува збор за едно од најстарите културно-уметнички друштва во Македонија.

- Сметам дека културно уметничкото друштво,и воопшто овој тип на негување на фолклорната традиција е запазување на традицијата и етно вредностите на една нација, изјави градоначалникот на општина Куманово,Зоран Дамјановски.

Во четврток во кумановскиот Центар за култура, ќе настапат ансамблите „Варна“ од Бугарија, „Шумадија“ од Горњи Милановац, фолклорниот ансамбл „Битола“, „Етнос“ од Скопје и домаќините од „Панче Пешев“.