Одбележани 73 години од смртта на народниот херој Страшо Пинџур

Седумдесет и три години од смртта на народниот херој Страшо Пинџур беа одбележани денеска пред спомен куќата на Пинџурови во кавадаречкото село Ваташа. За животот и делото на Страшо, пред присутните говореше Марија Михова, историчар при кавадаречкиот музеј.

- Меѓу плејадата борци за слобода и револуцонери од овој крај, видно место зазема Страшо Пинџур, кој загина на само 28 годишна возраст, давајќи го својот живот за слободата на Македонија. Завршил правни науки во Белград и уште како млад навлегол во редовите на напредното младинско и револуционерно движење, за што бил и апсен и лежел затвор. Еден е од иницијаторите за формирање на првиот партизански одред во Македонија, рече, меѓудругото, Михова.

Во средината на декември 1942 година Страшо Пинџур и Мирче Ацев дошле по партиска задача во Велес.

- Биле уапсени на 18 декември. Во затвор биле ѕверски мачени. До ден денес не се знае каде завршило телото на Страшо Пинџур, еден од најголемите револуционери и политички раководители на Македонија од времето на Втората светска војна, нагласи Михова.