Одбележани 30 години КУД „Пере Тошев“

Културно уметничкото друштво „Пере Тошев“ синоќа во Центарот за култура „Марко Цепенков“ во Прилеп со целовчерен концерт одбележа 30 години постоење на друштвото. КУД „Пере Тошев“ пред публиката го претстави богатиот репертоар на староградски песни и хармонизирани староградски песни.

Членовите на друштвото се горди на јубилејот зашто, како што велат работеле со голема љубов, ентузијазам и посветеност со единствен цел да да ја негуваат староградската македонска песна.

По повод 30-годишниот јубилеј на КУД „Пере Тошев“, градоначалникот на Прилеп, Марјан Ристески, им подари уметничка слика со градскиот саат, како симбол на договечноста на ова КУД. При оваа пригода тој им посака уште многу јубилејни настапи.

- КУД „Пере Тошев“ преставува културен бренд на градот и затоа има огромна поддршка од локалната самоуправа. Уште долго време да опстојуваат и да ја забавуваат, не само прилепската и македонската публика, туку со своите настапи да продолжат и надвор да ја презентираат македонската староградска песна, рече Ристески.

На јубилејниот концерт, во чест на 30 години од постоењето на КУД „Пере Тошев“ настапија и КУД „Моминок“, „Севдах“, гости од Врање и „Прилепски еснаф“.

КУД „Пере Тошев“ е формирано во 1987 година. На почетокот броело 25 члена, во чиј состав имало мешан хор и рецитаторска секција. Сега брои повеќе од 30-тина членови. Во изминатиот период учествувало на голем број реноминирани домашни и странски културни манифестации, а за промовирање на градот, за негување на македонската староградска музика, КУД „Пере Тошев“ е и добитник на највиското градско признаие, Третоноемвриската награда на град Прилеп.