Одбележан патронот на манастирот „Света Марина“ во Туминец, Мала Преспа

Македонците од областа Мала Преспа го одбележаа патронот на манастриот „Света Марина“ во селото Туминец.

По повод денешниот празник посветен на Света великомаченица Марина – Марена – Огнена Марија, по традиција во Туминец беа не само жители од селата на Мала Преспа, туку и од подрачјето на Корча, Ресен и Прилеп.

За овој празник присутни беа и дел од поранешните жители и нивните потомци, кои сега живеат во други градови во Албанија, во Република Северна Македонја и Грција.

Одбележувањето почна од синоќа кога во дворот на манастирот до доцна во ноќта се виеше македонско оро и се пееја македонски песни, а по денешната Богослужба што ја одржа свештеникот Алексо Темелко, верниците продолжја со одблежувањето.

На патрониот празник присуствуваше и пратеникот во албанскиот парламент, Васил Стерјовски.

– Редовно сум тука за овој голем празник и одбележувањето на патронот на црквата, што ги обединува граѓаните со природната, духовната и човечката убавина и доблест. Честит и вековит да ни е празникот. Се помоливме за помош од Света Марена за здравје, многу повеќе радост, среќа, благосотојба, рече меѓу другото Стерјовски.

На ланското одбележување на патронот, заедно со македоците беше и албанскиот претседател, Илир Мета.

– Вие сте прекрасна заедница, мирољубива и трудољубива, која заслужува една подобра иднина. Да ни е напомош на сите нам за подобра иднина Светата великомаченица Марена. За Пустец, за Албанија, за Македонија и за нашиот прекрасен соживот. Убавини и добрини секогаш, рече Мета, кој ја посети и пештерската црква „Света Богородица“ во Туминец.

Селото Туминец е едно од десетте населени места во Мала Преспа. Се наоѓа на брегот на Преспанското Езеро во близина на граничниот премин Стење-Горица, и е второ село по големина, со околу 800 жители. Во овој манастир се наоѓаат поголем дел од моштите на Светицата каде се уште се случуваат чуда над нејзините мошти.