Објавен конкурсот за наградата „Жан Моне“ за 2015 година

Делегацијата на Европската Унија го објави конкурсот за наградата „Жан Моне“ за најдобри достигнувања во покривањето теми поврзани со ЕУ и со пристапувањето на земјата кон ЕУ, соопшти Канцеларијата на ЕУ во Скопје.

Наградата „Жан Моне“ ќе биде доделена во три натпреварувачки категории за најдобар новинарски напис (за написи објавени во печатени медиуми и/или на интернет), за најдобра репортерска фотографија (за фотографии објавени во печатените медиуми и/или на интернет) и за најдобра аматерска фотографија.

Творбите што ќе учествуваат во категоријата за најдобар новинарски написи се авторски написи за ЕУ и за пристапувањето на земјата кон ЕУ објавени во домашни весници, списанија и на веб-страници во периодот меѓу 16 ноември 2014 и 17 ноември 2015.

Конкурсот за најдобра репортерска награда (за фотографии објавени во печатени е отворен за сите професионални фоторепортери и фотографи од земјата, кои ќе може да испратат најмногу три (3) фотографии за теми поврзани со ЕУ, објавени во периодот помеѓу 16 ноември 2014 и 17 ноември 2015. Наградата за оваа категорија е статуетка, диплома и парична награда од 1.000 евра.

Конкурсот за најдобра аматерска фотографија е отворен за сите фотографи-аматери од земјата, кои може да достават една фотографија на тема поврзана со ЕУ или со пристапувањето на земјата кон ЕУ. Фотографиите што се натпреваруваат во оваа категорија може, но не мора да бидат претходно објавени. Наградата за аматерска фотографија е диплома и парична награда од 500 евра.

Текстовите и фотографиите треба да се испратат на имејл-адресата JMcompetition@euic.mk, најдоцна до 17 ноември 2015, до 14 часот. Наградата за оваа категорија е статуетка, диплома и парична награда од 1.000 евра.

Церемонијата за доделување на наградите ќе се одржи на 17 декември 2015 година.