Објавен документ напишан од Гоце Делчев, шифрирана азбука со која контактирал со четите

Денес се навршуваат 154 години од раѓањето на Гоце Делчев, еден од најзначајните македонски револуционери, визионери и идеолози на борбата за слобода и независност.

По повод овој значаен датум од македонската историја, Државниот архив објави автентичен и оригинален документ напишан од самиот Гоце Делчев. Станува збор за шифрирана азбука која Делчев ја користел за тајна комуникација со револуционерните чети, поврзана со снабдувањето со оружје и движењето низ населените места во Македонија.

Од Државниот архив посочуваат дека употребата на ваквата азбука обезбедувала целосна тајност на комуникацијата, што било од клучно значење за безбедноста и успешното функционирање на револуционерното движење. Документот претставува јасен доказ за високата организациска способност и стратегиската мисла што ја поседувале македонските револуционери.

Преку ваквите архивски материјали, јавноста денес има можност да ја почувствува живата врска со минатото и подобро да ја разбере големината на борбата за слобода и независност. Гоце Делчев, како што истакнуваат историчарите, не бил само борец со оружје, туку и истакнат интелектуалец кој длабоко верувал дека силата на народот лежи во знаењето, дисциплината и единството.