Цимерот осомничен за убиството на 48-годишниот бездомник во Битола

Битолчанецот П.А.(53) е осомничен за убиството на 48-годишниот бездомник С.Д. од Битола, што се случи ноќта на 24 спроти 25 јануари, во куќата каде што заедно живееле. 

Поради постоење основано сомнение за сторено кривично дело „убиство“ СВР Битола поднесе кривична пријава против П.А. за настанот којшто се случил во текот на ноќта на 24/25 јануари во точно неутврдено време.

- Пијавениот со употреба на физичка сила и тврди предмети на свиреп и подмолен начин, му нанел повеќе повреди по целото тело и на тој начин го лишил од живот С.Д. (48) од Битола, со кого заедно живеел во иста куќа на ул.“4-ти Ноември“ во Битола. Со намера да го прикрие ова свирепо убиство, пријавениот во времето околу 5:50 часот на 25.01.2017 година се упатил во соседната куќа, барајќи помош и кажувајќи дека непознати лица ги нападнале додека спиеле, по што истиот е хоспитализиран во Клиничка болница во Битола, поради укажување медицинска помош, заради повредите за кои изјавил дека настанале при тој напад, се наведува со воопштението од МВР. 

На местото на настанот увид извршил ЈО од Битола, како и увидна екипа од ОКТУПА при СВР Битола. Од увидот, од извршените вештачења, како и од разговорите со повеќе лица, вклучително и со пријавениот, констатирано е постоење основано сомнение дека  П.А. е сторител на кривичното дело, се наведува во соопштението.