Соработка на Стопанската комора и НБРМ за унапредување на финансиската едукација

Стопанската комора на Македонија и Народната банка на Република Македонија (НБРМ) потпишаа меморандум за соработка во областа на унапредување на финансиската едукација.

Целта е да се зголеми финансиската свест, да се подобри финансиската писменост кај младото и возрасното население и тоа да се стекне со соодветни вештини и знаења коишто ќе му овозможат да донесува рационални и ефективни одлуки при управувањето со парите и финансиските услуги и производи, соопшти денеска Стопанската комора на Македонија.

Истакнуваат дека нивната улога е преку здруженијата во рамки на Комората да ја информира и да ја поттикнува бизнис-заедницата да даде поддршка за спроведување проекти во финансиската едукација, согласно нивните можности и интереси. Со тоа, посочуваат, Комората активно се вклучува во постојниот Проект за финансиска едукација на Народната банка.

Истовремено, пак Народната банка ги поддржува проектите за финансиска едукација на Комората (преку Центарот за едукација во рамки на Комората и Бизнис-центарот за тренинг и обука) за спроведување едукативни активности, како што се: одржување предавања, семинари, работилници, тркалезни маси, конференции, интерни обуки и други настани, организирање промотивни едукативни настани, публикување едукативни материјали, летоци, брошури и други активности од областа на финансиска едукација, коишто се од заемен интерес за двете институции, како и за сите субјекти коишто се вклучени во наведените проекти, се вели во соопштението.