Од јануари Германија ја зголемува минималната плата

Почнувајќи од јануари идната година германските работници ќе добиваат за четири отсто повисока минимална плата, одлучи германската Сојузна влада.

Владата денеска одлучила да ја зголеми минималната вредност на еден работен час од 8,5 евра на 8,84 евра, а зголемуввањето е препорачано од владината комисија која што има задача да го ревидира нивото на платата на секои две години.

Како што јави дописникот на МИА од Берлин, покрај другите фактори, на нивото на минималната плата влијаат и резултатите од преговорите меѓу синдикатите и работодавците.

Минималната плата во Германија беше воведена во 2013 година на инсистирање на социјалдемократите, кои гарантираното ниво на месечни примања го поставија како еден од предусловите за влегување во „големата коалиција“ со демохристијаните на канцеларката Ангела Меркел.