Македонија
17. August 2015 - 17:18

Слаб интерес кај студентите за битолскиот универзитет

Новите студиски програми на Факултетот за биотехнички науки и Факултетот за информатички и коминикациски технологии при битолскиот универзитет побудија слаб интерес кај идните студенти во првиот уписен рок. Од друга страна, по подолго време, зголемен е бројот на заинтересирани за студирање на Техничкиот факултет. Од ректорската управа се задоволни како помина УКЛО на првиот уписен рок и очекуваат повторување на бројот на запишани бруцоши од минатите години.

Студиската програма агроменаџмент на Факултетот за биотехнички науки и студските програма по информатички науки и комуникациско инженерство на лани отворениот Факултет за информатички и коминикациски технологии најлошо поминаа на првиот уписен рок на битолскиот универзитет. Од битолскиот ректорат ќе почекаат да се исцрпат сите можности за пријавување на кандидати во сите рокови, по што ќе следи анализа на состојбите.

Најголем интерес во првиот уписен рок имало за Факултетот за безбедност во Скопје и Факултетот за туризам и угостителство во Охрид. На најмладата единица на УКЛО се пријавиле 147 кандидати од 660 можни, а на останатите факултети процентот на заинтересирани бруцоши се движи од 30 до 35 проценти од предвидените квоти. По подолго време, зголемен е интересот за студирање на Техничкиот факултет.

Универзитетот „Св.Климент Охридски“ - Битола денес ги објави и конкурсите за упис на студенти во втор циклус студии - магистерски и стручно - специјалистички студии за што огласени се 1.185 места, како и за трет циклус студии - докторски студии за што се огласени 111 места за 18 студиски програми.