Се реконструира дел од улицата „Браќа Миладиновци“ во Тетово

Градоначалничката на општина Тетово Теута Арифи денеска изврши увид во финалната фаза од градежните работи за реконструкција на делот од улицата „Браќа Миладиновци“ од Шарената Џамија до текстилното училиште. Активностите се дел од годишната програма на локалната власт за обнова на улиците и пополнување на ударните дупки низ градските сообраќајници.

- Иако и минатата година интервениравме тука со крпење на ударните дупки, нивното повторно појавување значеше дека годинава ќе треба да се преземе посериозен зафат со целосна реконструкција на овој најоштетен дел од улицата. Се работи за асфалтирање на околу триста метри од улицата со ширина од околу шест метри, колку што дозволуваат куќите и дворовите тука бидејќи станува збор за стара населба, изјави Арифи.

Таа посочи дека сите активности за обнова на улиците и булеварите низ Тетово се финансираат од општинскиот буџет.

- За слични инвестиции во населените места од околината на градот како локална власт аплицираме во повеќе програми како што е оној за поддршка на руралниот развој и со тоа се финансираат проектите за обнова на локалните патишта меѓу селата, како и патот кон излетничкото место Бањиче. Со ослободување на општинскиот буџет од овие инвестиции можеме да ги финансираме зафатите низ градот, рече Арифи.

Во изминатиот период беа реконструирани повеќе улици, како дел од улицата „Иво Рибар Лола“ од старата библиотека до музичкото училиште, улицата „150“, делот од улицата кај спортскиот центар во Тетово, како и изградбата на кружниот тек кај музичкото училиште.