ДОМ: Владејачките партии да покажат одговорност во преговорите

Демократската обнова на Македонија (ДОМ) апелира до двете владејачки партии да покажат одговорност и сериозност во преговарачкиот процес и во интерес на граѓаните, да овозможат создавање услови за фер и демократски избори.

Само така, стои во денешното соопштение од ДОМ, ќе заврши политичката криза, по која ќе треба да започнеме нов процес на враќање на старите позиции и одење напред.

Од ДОМ изразуваат незадоволство од однесувањето на владејачките партии во преговарачкиот процес за излез од политичката криза. 

- Дента кога јавноста очекуваше објава на 40.000 имиња на последен увид, владејачките партии излегоа со најнов, креативен предлог - да има трет список и сите да се сметаат за валидни!? Во превод, тоа значи да можат и на следните избори да се повторат изборните манипулации!, стои меѓу другото во соопштението од ДОМ.

Во соопштението ДОМ посочува дека додека власта се занимава со избирачкиот список, Македонија губи милиони, а ја губи и својата перспектива да стане нормална држава со високи стандарди за живот.