Нови 30 вработувања во рудникот „Саса“, досега ангажирани над 700 лица

Продолжената концесија за експлоатација во рудникот „Саса“ овозможи нови 30 вработувања, главно жители на општина Македонска Каменица со што рудникот се зајакнува и кадровски.

 

Ова го истакна Максим Прохоров, директор за развој и инвестиции во рудникот „Саса“, кој потенцира дека во моментов се изведува обука на 30 млади во рудникот.

 

- Ние започнавме да ги остваруваме вработувањата, во овој момент имаме 30 млади момчиња кои се на обуки во рудникот Саса, со цел да ги поминат тие обуки за понатамошно вработување во рудникот, а таа динамика ќе ја следиме последователно. Ќе направиме и ревизија на состојбата на работните места на крајот на оваа година и се надеваме дека со овие обуки ќе ги охрабриме младите луѓе да влегуваат во јамата, да се вработуваат во рудникот без страв за нивната безбедност, рече Прохоров.

 

Градоначланикот на Македонска Каменица, Дарко Митевски, истакна дека за општината новите вработувања на млади луѓе ќе значи и економска стабилност на нивните семејства и нивно задржување во родниот град.

 

Во рудникот во моментов се директно ангажирани 700 работници, дополнително се ангажираат преку фирми изведувачи уште 90 до 100 работници кои директно работат само за потребите на „Саса“ со што овој рудник  е најголем работодавач во  регионот.