Форест фест во Берово и Пехчево

 

Како што информира Марин Демировски од Општина Берово, целта на манифестацијата е да го стави руралниот развој во фокусот и да ја акцентира вредноста на шумите.

 

- Фестивалот ќе има едукативен, натпреварувачки, промотивен, саемски, рекреативен и забавен дел. Посетителите ќе можат да присуствуваат на промоции на книги, видеа, филмови, изложби, форуми од еколошки карактер, натпревари во шумски вештини, планински и велосипедски тури. Главниот настан ќе се одржи на Беровско Езеро во сабота, каде, според агендата, е предвиден и натпревар во шумарски вештини кои се многу атрактивни за овој регион зашто се и професионална дејност на многу наши сограѓани. Ќе има и промоција на локални производи, рече Демировски.

 

На фестивалот ќе има учесници од Балканот и пошироко. 

 

- Очекуваме околу 200 учесници од целиот регион, Хрватска, Србија, Бугарија, Албанија, Црна Гора, а ќе има и предавачи од други европски држави. Освен натпреварувачки дел, предвидени се и панел дисусии, како и посета на локалитети. Среќни сме што овој Форест фест оваа година се проширува и ќе се одвива регионално и вклучена е и општина Пехчево. Овој фестивал е значаен за овој регион и сигурен сум дека во иднина ќе се развива и ќе добие национален карактер, рече Демровски.

 

Шумите покриваат околу 40 отсто од целокупната територија на Македонија и се важен природен ресурс за околу 60.000 сопственици на приватна шума, особено во ридско-планинските подрачја.

 

Фестивалот е поддржан од CNVP-Македонија, а го организираат општините Берово и Пехчево, Националното здружение на сопственици на приватни шуми и Програмата за зачувување на природата во Македонија. дт/мч/10:51