Бели тартуфи тешки 850 грама продадени за неверојатни 100.000 евра во Италија

Два ретки бели тартуфа, со вкупна тежина од 850 грама, се продадени за 100.000 евра на аукција во Италија, а купувачот е од Хонгконг.

Продажбата се одржала во неделата, на 8 ноември, во рамки на 27. Светска аукција на бели тартуфи од Алба, во замокот Гринцане Кавур, во италијанскиот регион Пиемонт.

Двата тартуфа биле пронајдени заедно во областа Ланге, а наддавањето за нив започнало од 20.000 евра. По повеќе понуди, конечната цена достигнала 100.000 евра.

На аукцијата биле продадени и други примероци, меѓу кои тартуф од 300 грама за 14.000 евра и тартуф од 250 грама за 10.000 евра.

Белите тартуфи од Алба се меѓу најретките и најскапите гастрономски деликатеси во светот. Растат под земја, во близина на корените на одредени дрвја, а нивната реткост, специфична арома и тешкото пронаоѓање придонесуваат за високата цена.

Организаторите соопштија дека средствата собрани од аукцијата се наменети за хуманитарни проекти во Италија и во странство.