Трамп со шефовите на најголемите технолошки компании потпиша документ за вештачката интелигенција

Американскиот претседател, Доналд Трамп, синоќа со шефовите на најголемите технолошки компании потпиша „морално обврзувачки“ документ за вештачката интелигенција (ВИ).

„Тоа на некој начин е како устав и го потпишаа најголемите луѓе во светот, го потпишав и јас како претседател и тоа навистина е еден вид заштита“, изјави Трамп пред новинарите по состанокот.

Документот го опиша како „морално обврзувачки“ и додаде дека неговата администрација размислува за формирање тело за надзор.

„Размислуваме за формирање комисија во која можеби би имало десет луѓе… така што таа комисија ќе ја надгледува целата работа“, изјави Трамп, без да даде други детали.

Владите ширум светот се обидуваат да го следат забрзаниот развој на ВИ. Водечките компании од индустријата предупредија на опасностите од ВИ за човештвото, повикувајќи ги владите заеднички да управуваат со сè помоќната технологија.

Трамп претходно изјавуваше дека на САД не им е потребна посебна регулатива за ВИ. Неодамна, на Генералното собрание на ОН, тој изјави дека „ги отфрла обидите за воспоставување глобална шема за контрола на ВИ“.

Меѓу извршните директори на технолошките компании кои присуствуваа на состанокот во Белата куќа беа Дарио Амодеи од Антропик, Марк Закерберг од Мета, Сундар Пичаи од Гугл, Џенсен Хуанг од Нвидиа и Алекс Карп од Палантир.

Трамп се сретна со нив истиот ден кога најави нова ВИ-услуга која треба да им го олесни на граѓаните користењето на владините услуги.

По тој повод, тој изјави дека не сака заедно со кинескиот претседател Шји Џјинпинг да работи на управувањето со технологијата на ВИ, бидејќи тоа би им отежнало на американските компании да создаваат подобри производи од кинеската конкуренција.

Трамп исто така рече дека разговарал со Шји за ВИ кога кинескиот претседател минатата недела го посетил Вашингтон, додавајќи дека САД со владата на Си веќе соработуваат „во многу работи“.

„Пред Кина сме и пред сите други и сакам така да остане“, рече Трамп.

МИА