Вардар во криза? Поразот од КуПС отвори многу прашања

По поразот од 2:0 од финскиот шампион КуПС во првиот квалификациски натпревар, во јавноста се појавија сериозни критики за состојбата во ФК Вардар, навивачите и спортските аналитичари отворија прашање дали клубот се соочува со организациска и резултатска криза.

Најголем дел од забелешките се однесуваат на подготовките во Италија, изборот на противници за контролните натпревари, летниот преоден рок и настапот на новите засилувања, особено фудбалерите кои пристигнаа од Аргентина. Критики има и за играта на тимот, за која се оценува дека била без јасен план и препознатлив систем.

На удар се најдоа и тренерот Кристијан Фабиани, како и клупското раководство предводено од Миленко Неделковски. Во дел од коментарите се поставуваат прашања околу трансфер-политиката, изборот на засилувања и начинот на кој се носат одлуките во клубот, додека се бара и поголема вклученост на сопственикот Атила Бијан Јалили.

Според критичарите, актуелниот Вардар остава послаб впечаток од тимот од минатата сезона, кој под водство на Гоце Седлоски беше поорганизиран и поконкурентен на европската сцена.

И покрај негативата од два гола, Вардар ќе има можност на реваншот против КуПС да се обиде да го поправи впечатокот и да остане во игра за пласман во следната квалификациска рунда. Сепак, поразот во Скопје отвори бројни дилеми околу насоката во која се движи најтрофејниот македонски клуб.