Генералниот секретар на ОН побара од САД и Иран да продолжат со мировни преговори

Генералниот секретар на Обединетите нации, Антонио Гутереш, ги повика САД и Иран да ги обноват мировните разговори и да вложат сериозни напори за постигнување трајно решение за блискоисточнот конфликт.

„По недели уништување и страдање, јасно е дека нема воено решение за актуелниот конфликт“, напиша Гутереш на социјалната мрежа Икс, повикувајќи на продолжување на преговорите.

Тој нагласи дека актуелното двонеделно примирје мора целосно да се почитува и додаде дека сите прекршувања треба веднаш да престанат.

Гутереш истакна дека сите страни во конфликтот мора да ја почитуваат слободата на пловидба, вклучително и низ Ормускиот теснец, согласно меѓународното право.

Во меѓувреме, САД од вчера воведоа поморска блокада на теснецот, а претседателот Доналд Трамп предупреди на можност од воени интервенции против ирански бродови. 

Од Централна команда на САД соопштија дека ќе биде ограничен транзитот на одредени бродови низ таа стратешка поморска рута, при што мерките се однесуваат на пловила поврзани со ирански пристаништа во Персискиот Залив и Оманскиот Залив, додека останатиот поморски сообраќај не е засегнат.

Техеран таквите потези на Вашингтон ги оцени како „пиратство“.

Блокадата беше најавена по неуспехот на 21-часовните разговори меѓу САД и Иран, одржани во Пакистан.

Ормускиот теснец, што се наоѓа меѓу Иран и Оман, претставува една од најкритичните поморски рути за глобалната трговија со нафта.

По избувнувањето на конфликтот на 28 февруари, Техеран практично го блокираше теснецот, што доведе до прекин во поморскиот сообраќај и раст на цените на енергенсите на светскиот пазар.

МИА