Полициска потрага во кипарскиот град Лимасол по лицето кое го фатило светиот крст и побегнало

За време на прославата на Богојавление и осветувањето на водите на старото пристаниште во градот Лимасол на Кипар, бил изгубен светиот крст фрлен во морето, откако лицето кое го фатило, веројатно побегнало, по што полицијата истражува евентуална кражба на крстот, објавија кипарските медиуми, јави дописничката на МИА од Атина.

Според истите информации, по завршувањето на церемонијата, последниот верник што го зел крстот в раце рекол дека ќе го предаде на свештеното лице, меѓутоа, потоа го напуштил местото и е непознато каде се наоѓа.

Од кипарската полиција соопштиле дека се истражува можноста за губење или дури и кражба на крстот во рамки на прославата на Богојавление во Лимасол.

Станува збор за дрвен крст и во тек се обидите на полицијата за негово пронаоѓање.

Неочекувана разврска имало и на прославата на Водици во Аја Напа, кога златниот крст се загубил на дното на морето и митрополитот бил принуден да фрли друг, но овој пат дрвен крст.

Според онлајн изданието на весникот „Филелефтерос“, над 30 лица, скокнале во морето за да го извлечат златниот крст што го фрли митрополитот, но крстот се загубил на дното и, и покрај повеќекратните обиди на верниците, не можеле да го пронајдат.

Поради тоа, бил фрлен и друг, но дрвен крст, фатен од две лица, а подоцна, сепак бил пронајден и првиот, златниот крст. 

МИА