Ахмети: Јас ја уништив Југославија, jас не сум претставник на мачки туку на лавови

Али Ахмети, на брифинг со новинари, изјавил дека токму тој имал клучна улога во распадот на Југославија и предупредил дека доколку излезе на улица, тоа би било без враќање.

Тој истакнал дека во Македонија нема друг кој подобро знае како се гради национализам, нагласувајќи дека дваесет години го реализирал проектот од 1981 до 2001 година. Според неговите зборови, во своите настапи никогаш не се занимавал со ВМРО, СДСМ или Влен, туку јасно им ги соопштил своите ставови на, како што ги нарекол, вазалите во периодот од 2002 до 2025 година. Ахмети оценил дека тие не нудат трајно и одржливо решение, пренесуваат медиумите кои биле присутни на брифингот.

Тој додал дека планот А останува насочен кон развој и напредок на државата и изразил надеж дека нема да има потреба од преминување на планот Б.

Во таа насока, Ахмети повторил дека неговото евентуално излегување на улица би било конечен чекор, нагласувајќи дека не претставува „мачки“, туку „лавови“.