Рим ќе наплаќа влез за фонтаната Ди треви

Сите кои ќе сакаат да го посетат Рим, а истовремено и да уживаат во глетката на фонтаната Ди Треви од февруари ќе мора да плаќаат две евра. Одлуката, која ја соопшти градоначалникот на Рим, Роберто Гвалтиери, се очекува на градот да му донесе околу 6,5 милиони евра годишно. Гвалтиери посочи дека пренатрупаноста и зачестените кражби биле една од главните причини за воведување контролиран пристап.

Фонтаната Ди треви е една од најпосетуваните туристички атракции во Рим. Дневно ја посетуваат околу 30.000 луѓе, а бесплатно ќе можат да ја разгледуваат само жителите на италијанската престолнина. Сите останати кои ќе сакаат да заштедат две евра ќе мора тоа да го прават од далечина.

И покрај ваквата промена од страна на властите, обичајот на фрлање паричка во фонтаната, поврзан со верувањето за исполнување желби, останува непроменет, а собраните пари потоа се донираат на хуманитарната организација Каритас.

Со цел да го заштитат културното наследство слични мерки воведуваат и дел од другите градови во Италија. Во 2023 година беше воведена наплата за влез во Пантеонот, додека Венеција минатата година почна да наплаќа туристичка такса за влез во централното градско подрачје за време на периодите со најголема посетеност.

МИА