Лавров: За секоја акција постои реакција

Рускиот министер за надворешни работи Сергеј Лавров, коментирајќи го воведувањето санкции од западните земји против Русија, синоќа изјави дека „за секоја акција постои реакција“.

– Животот низ вековите докажа дека за секоја акција постои реакција, рече Лавров за време на пленарната седница на министерскиот состанок на Форумот за партнерство Русија-Африка, пренесува „Известија“.

Тој нагласи дека Русија претпочита да се фокусира на координација на работни и ефикасни механизми кои ќе помогнат во обезбедувањето на трговските и економските врски и ќе ги направат независни од оние кои „ги кршат сите принципи на меѓународното право“ и „прибегнуваат кон уцени и притисоци“.

Ден претходно, претседателот на Европскиот совет Антонио Кошта соопшти дека учесниците на самитот на Европската унија одлучиле да ги продолжат санкциите против Русија за шест месеци. Според него, на самитот на ЕУ е одлучено да се наложи на Европската комисија да ја продолжи работата на „репарациониот кредит“ за Киев користејќи го замрзнатиот руски имот. 

МИА