Русија негира упади на нејзини воени авиони во воздушниот простор на држави членки на НАТО

Кремљ денеска ги отфрли како „неосновани“ соопштенијата на членките на НАТО дека руски воени авиони го нарушиле нивниот воздушен простор.

Одговарајќи на пријавите за упади, портпаролот на Кремљ, Дмитриј Песков, изјави дека „тие тврдења ги сметаме за бесмислени, неосновани и продолжение на целосно неумерената политика што се состои во поттикнување на тензии и создавање клима на конфликт“.

Тензиите меѓу Москва и НАТО во моментов се најголеми од почетокот на руската офанзива во Украина во февруари 2022 година.

Естонија минатата недела соопшти дека во петокот три руски ловци 12 минути ја надлетувале нејзината територија, што Русија го негираше, а НАТО и ЕУ протестираа поради таа „нова руска провокација“.

Прашањето денеска итно ќе го разгледува Советот за безбедност на ОН, а утре во Брисел ќе заседаваат и претставници на сите 32 земји членки на НАТО.

Почетокот на септември беше обележан со тоа што дваесетина руски дронови влегоа во воздушниот простор на Полска, од кои три беа соборени од полски авиони и холандски авиони Ф-35. Тоа беше првпат НАТО, од неговото основање во 1949 година, да изведе таква акција.

Неколку дена подоцна Романија исто така укажа дека руски дрон го нарушил и нејзиниот воздушен простор.

МИА