Прекумерната употреба на лекови за болка ја зголемува отпорноста кај бактериите кон лекови

Прекумерната употреба и злоупотребата на „Парацетамол“ и „Ибупрофен“ придонесува за зајакнување на бактериите и со нив поврзаните болести, што ги прави поотпорни на антибиотици, а тоа пак, би можело да предизвика сериозна здравствена криза.

Во напис објавен во списанието „Нејчр антимикробијалс енд резистенс“ (Nature Antimicrobials and Resistance), научници од Универзитетот на Јужна Австралија објавија дека тие два лека ја зајакнуваат отпорноста кај бактериите, коешто го опишаа како „светска закана“ за здравјето на луѓето.

Според истражувачите, нивниот труд „обезбедува докази дека лековите што служат за ублажување на болка, комбинирани со антибиотикот „Ципрофлоксацин“, на пр. при лекување од бактериски инфекции како „Escherichia coli“ (Ешерихија коли), не само што значително ја зголемуваат зачестеноста на мутациите, туку и развиваат повеќекратни отпорности на антибиотици кај бактериите.

-Антибиотиците долго време беа клучни во борбата против заразните болести, но нивната прекумерна употреба и злоупотреба доведоа до глобално зголемување на бактериите отпорни на антибиотици, изјави една од авторите на научниот труд, Рити Вентер.

Авторите ги предупредуваат пациентите и лекарите „внимателно да ги разгледаат ризиците од користењето различни лекови“, особено кога се препишуваат за долготрајни терапии. Откритието има „сериозни здравствени импликации“, предупредија научниците, при што лицата во домовите за стари и изнемоштени се особено загрозени, со оглед на тоа што најверојатно земаат повеќе различни лекови истовремено.