Милевски: Саудиска Арабија е предизвик за сите наши играчи

Македонската фудбалска репрезентација утре ќе одигра пријателски натпревар со Саудиска Арабија на неутрален терен во Прага, а селекторот Благоја Милевски очекува максимална мотивираност на своите избраници.

Контролниот дуел со азиската селекција е можност за Милевски да испроба одредени тактички варијации и да им даде шанса на повеќе репрезентативци, а тој во последната изјава ја најави и својата перспектива за дуелот кој ќе игра на стадионот на Викторија Жижков.

-Очекувам секој поединец да го покаже својот максимум и да се наметне во зголемувањето на конкуренцијата во тимот. Сакам да видам дека Македонија може, дури и преку оние кои имаат помала минутажа, играчи кои бараат нови средини или подоцна го решија својот клупски статус.

-Се надевам дека тоа нема да се одрази на нивната физичка подготвеност. Најважно ми е сите да бидат здрави. Саудиска Арабија е редовен учесник на Светските првенства и го гледам дуелот како еден предизвик за сите наши играчи. Мислам дека сите кои ќе настапат, ќе бидат во функција на она што не очекува во недела, тоа е дуелот со Лихтенштајн”.

Натпреварот Македонија-Саудиска Арабија утре ќе се одигра од 17 часот.

МИА