АХВ: На македонскиот пазар го нема бисквитот со вкус на павлака на „Das gesunde PLUS“

До денес Македонија нема добиено известување преку Системот за брзо предупредување на Европската унија дека на македонскиот пазар е пласиран небезбеден производ - „Das gesunde PLUS“, бисквит плочка со вкус на слатка павлака.

Станува збор за производ кој е повлечен од пазарите на Германија, Австрија, Франција и Хрватска и за кој на 4 март е објавена нотификација по поднесена поплака на потрошувач, кој нашол пластични делови од четка во производот.

- Агенцијата за храна и ветеринарство доколку добие нотификација преку овој безбедносен систем (РАССФ), со соодветни податоци за серијата/лотот на производство за овој небезбеден производ, ќе постапи согласно протоколите и ќе го повлече од македонскиот пазар, се наведува во соопштението.