Израелскиот воздушен простор останува затворен за цивилниот сообраќај

Израелскиот воздушен простор останува затворен за цивилен сообраќај, односно за сите полетувања и слетувања на меѓународниот аеродром Бен Гурион, соопшти Управата за аеродроми на Израел.

Во соопштението се наведува дека евентуалната одлука за повторно отворање на воздушниот простор ќе биде најавена најмалку шест часа однапред.

Управата за аеродроми, заедно со израелските авиокомпании, Министерството за сообраќај и безбедност на патиштата и Управата за цивилно воздухопловство, работи на план за враќање на израелски државјани кои се заглавени во странство.

„Целата флотила и екипажите се подготвени за акција веднаш штом тоа ќе биде можно“, се наведува во соопштението.

Сепак, од управата предупредуваат дека тоа би можело да потрае, во зависност од безбедносната состојба.

Граничните премини со Јордан и Синај се отворени и функционираат за патнички и деловен сообраќај.