Мицкоски: Извозот во овој квартал се стабилизира, иако постои силен предизвик со кризата во автомобилската индустрија

Премиерот Христијан Мицкоски денеска на прес-конференција информираше дека се согласува оти нашата земја треба да има поголем извоз, отколку увоз. Но, напомена дека разлика меѓу извозот и увозот е намалена за три пати, посочувајќи дека конечно извозот бележи позитивна стапка. 

-Ако се вратите неколку квартали наназад и ако се направи анализа ќе се  види дека трипати е намалена таа разлика помеѓу извозот и увозот и конечно извозот бележи позитивна стапка, рече Мицкоски, во одговор на новинарско прашање.

Тој додаде дека извозот во овој квартал е стабилизиран и покрај тоа што има силен предизвик, а тоа е автомобилската индустрија и кризата којашто ја има зафатено оваа индустрија.

-Вие знаете дека години наназад нашиот извоз и привлекување на странските инвестиции генерално се темелеше на портфолиото „производство на производи“, коишто се користат и вградуваат во автомобилската индустрија. Сега ние почнуваме практично да правиме дивергирање на тоа портфолио во некои други области. Инаку, сето ова што вие го кажавте е така. Но, ако се споредува со кварталите од пред година дена или повеќе, ќе видите дека има огромен напредок. Затоа, реков ова е само почеток и она коешто мене ме охрабрува е позитивната бројка, којашто е кај индустриското производство, позитивната бројка кај преработувачката индустрија, изјави Мицкоски.

Тој посочи дека има и намалувањето на невработеноста, во смисла на креирање на нови работни места за два квартали.

Тој истакна дека растот на Бруто домашниот производ (БДП) од меѓу три и четири проценти не е доволен и ако сакаме да имаме нешто поголем раст и тоа да се почувствува, ќе мора да се книжи растот, којшто би можел да биде меѓу четири до шест проценти на подолг рок.

- И тоа се стремиме како Влада да го направиме. Дали ќе успееме, времето ќе покаже. Нашата економија не зависи само од перформансите домашни, туку многу зависи и од перформансите надворешни. Имајќи во предвид дека ЕУ е 1,4, два и пол пати е поголем при овие услови навистина би рекол исклучок, а не правило, подвлече премиерот Мицкоски