Гаши: До собранието се уште не е доставена оставка на Таравари, ниту предлог за гувернер

До претседателот на собранието Африм Гаши се уште не е пристигната оставката на министерот за здравство Арбен Таравари.

Воедно нема пристигнато ниту предлог кој ќе биде координатор на пратеничката група на ВРЕДИ или кандидат за гувернер на Народната банка.

-Оставка се уште нема, а нема ни предлог за гувернер. Немаме никаква нова информација за пратенички групи, рече Гаши на денешната средба со новинарите.

Сега за сега, како што кажа, нема ни нов координатор од ВРЕДИ.

-На последната координација немаше никој од ВРЕДИ. На координација ги викаме координаторите додека тие официјално се координатори. Кога ќе имаме нова состојба ќе го поканиме оној којшто ќе биде координатор, појасни Гаши.

Министерот за здравство и лидер на едното крило на Алијанса за Албанците, Арбен Таравари синоќа рече дека тој ќе поднесе оставка од функцијата, а за останатите функционери од оваа партија очекува да бидат разрешени.

Премиерот Христијан Мицкоски, вчера, одговарајќи на новинарски прашања рече дека во периодот што следи ќе бидат номинирани нови имиња на местото на оние што и припаѓаа на Алијанса за Албанците.