Собраниската Комисија за здравство се сретнала со дел од членовите на Кризниот штаб за Кочани

Собраниската Комисија за здравство денеска имала средба со членови на кризниот штаб за Кочани, предводени од министерот за здравство Арбен Таравари. 

Претседателката на Комисијата за здравство Рашела Мизрахи објави дека денеска се остварила неформална средба помеѓу Комисијата за здравство при Собранието, министерот за здравство, директорот на Фондот за здравствено осигурување и членови на здравствениот кризен штаб оформен за згрижување и спроведување на жртвите од опожарената дискотека во Кочани.

-Пратениците го поздравија одличното менаџирање со жртвите на трагичниот настан, нагласувајќи дека успехот на здравствениот систем зависи во најголем дел од луѓето кои го сочинуваат тој систем. Огромна благодарност беше упатена и до сите оние од менаџментот, здравствениот и помошниот кадар кои директно или индиректно учествувале во справувањето со настанатата катастрофа, напиша Мизрахи на Фејсбук. 

Слична објава имаше и директорот на Фондот за здравство Сашо Клековски кој посочува дека на средбата имало корисна размена на информации и оддавање на признание.