Кремљ: САД и дадоа на Русија конкретни информации за нивниот предлог за прекин на огнот со Украина

Соединетите Држави и дадоа на Русија конкретни информации за нивниот предлог за прекин на огнот со Украина и ќе продолжат со разговорите лице в лице во наредните денови, соопшти Кремљ.

-Преговарачи од САД патуваат за Русија, додаде портпаролот на Кремљ, Дмитриј Песков, без да даде дополнителни детали.

Авионот што го користеше специјалниот пратеник на американскиот претседател Доналд Трамп, Стив Виткоф, рано утринава влезе во рускиот воздушен простор, јавија руските медиуми, повикувајќи се на апликацијата за следење летови „Flightradar“.

Песков изјави и дека вчера телефонски разговор имале советникот за надворешна политика на рускиот претседател Владимир Путин, Јуриј Ушаков и советникот за национална безбедност на САД, Мајк Волц.

Кремљ, сепак, одби да коментира дали Русија му доставила на Вашингтон список со барања за прекин на војната во Украина и обновување на билатералните односи со САД.

Два извори запознаени со разговорите изјавија дека руските и американските официјални лица разговарале за условите на Москва во лични и виртуелни разговори во текот на изминатите три недели.

-Не можам ниту да потврдам, ниту да коментирам за ова, рече Песков. „Можам само уште еднаш да повторам дека има огромна количина на информации кои не се вистинити или многу малку од нив се вистинити“, додаде тој.